Nagsaka sang eight percent ang fire incidents nga nagluntad sa syudad sang Bacolod sa tuig 2022 kumparar sa 2021.
Sa interview sang Bombo Radyo Bacolod kay Fire officer 1 Paul Servano sang Bacolod Fire Station, sang 2022 nakarecord sang 336 samtang sang 2021 nakarekord sang 333 kun sa diin makita ang 8 percent.
Suno kay Servano, kalabanan sang ginhalinan sang kalayo nga nagtuga sang sunog sang electrical, residential kag grass fire.
Ang Bacolod Fire Station ang nakarecord sang electric cause fire sang 2022 sang 133 samtang sang 2021 narecord ang 102; ang grass ukon sugar cane fire 100 ang narecord sang 2021 samtang sang 2022 88 kag ang sa structural ukon residential fire sang 2021nakarecord lamang sila sang 45 samtang sang 2022 nakarecord sila sang 76.
Samtang sa injuries naman sang 2021 nakarecord sila sang pito samtang sang 2022 nakarecord sila sang 17.
Suno kay Servano, apisar nga may narekord nga mga injuries wala sang nakarecord nga serious injuries kundi mga minor injuries lamang.
Ginpasalamatan man ni Servano nga wala sang casualties sa mga nagluntad nga sunog.
Ginalantaw man sang Bacolod Fire Station nga nagsaka ang fire incidents sang tuig 2022 kumparar sa tuig 2021 bangud kalabanan sang mga pumuluyo ang nakagwa na kag nagbalik na sa trabaho indi kaangay sang 2021 nga limitado ang paggiho sang mga pumuluyo bangud sa COVID-19 pandemic.
Nagpanugyan man si Servano nga kun maghalin sa puluy-an dapat siguruhon nga wala sang nakasaksak nga appliances ukon mas maayo nga patyon nalang ang mainswitch kasubong man ang mga LPG tanks agud malikawan ang sunog.
Importante man nga ipractice ang kampanya sang Bureau of Fire Protection nga ” KALIMUTAN SI MARITES, ISIPIN SI EDIT ukon Exit Drill in the Home” bangud tuman ka importante nga nakahibalo ang tagsa ka miyembro sang balay kun sa diin ang mga ini magwa sa tion nga magluntad ang wala ginapangayo nga sunog.
Nagakadapat man nga ipractice sa balay ang fire safety adlaw adlaw.
Ginpakigbahin man ni Servano ang mga contact numbers nga mahimo tawgan sa tion nga may sunog agud nga marespondehan gilayon ini ang 034-434-5022/034-434-5023 para sa telepono kag sa cellphone number nga 09-213-417-002.
