Fire Marshal sang Bacolod, pabor sa ginaduso sang DILG nga armasan ang mga bombero

Pabor ang city fire marshall sang Bacolod sa ginaduso sang Department of the Interior and Local Government (DILG) nga armasan ang mga bombero.

Sa interview sang Bombo Radyo Bacolod kay Fire Chief Inspector Publio Ploteña, wala siya sang nakita nga problema sa pagpa-armas sa mga bombero sa pungsod basta nga may yara sang nagakaigo nga guidelines.

Suno sa city fire marshall, mas maayo man nga may yara sang armas ang mga bombero kun magresponder sila sa mga sunog.

Nagapati si Ploteña nga maayo man ini nga pang-depensa sa ila kaugalingon kag makapatahap man sa mga tawo.

Nahibaluan nga magapain ang DILG sang P800-P900 million para ibakal sang armas sang kapin 29 mil ka mga bombero sa pungsod Pilipinas.