Nag-amat amat na diutay ang mga evacuees sa Apolinario Mabini Elementary School bangod iban sa mga fire survivors sa sunog sa Barangay 27, Bacolod City.
Sa interview sang Bombo Radyo Bacolod kay Bacolod City Administrator Atty Mark Steven Mayo, nagpatigayon ang city government sang clearing operations sa sulod sang duha ka adlaw, sang Biyernes kag Sabado samtang sang Domingo nagpahuway ang mga personnel sang ciudad.
Suno kay Mayo, subong nga Martes magaresume ang clearing operation sa Barangay 27 kag nagacoordinate man sila kay Punong Barangay Freeman Madalag bangud ang aggreement sang mga ini nga ang nagakinahanglan sang heavy equipment nga clearing amo ini ang i-assist sang city engineers.
Apang may yara man sang manpower nagikan sa Barangay bangud kun may yara sila sang luyag nga ipademolish sila lamang ang magamano-mano.
Sang Domingo ang mga residente man ang nagmano-mano demolish ang ila nga mga puluy-an kag kahapon, Lunes ang Barangay man ang nagpadayon sang clearing operations.
Ang demolition ang yara na sa 60 tubtob 70 percent ang completion.
Samtang kaangot sini santo man sa koordinasyon sa DSSD nga nagafacilitate sa mga evacuees sa Apolinario Mabini Elementary School, gikan sa masobra sa 250 ka pamilya yara na lang sa karun sa 124 ka pamilya ukon 449 individuals ang nagapabilin sa nasambit nga eskwelahan.
Bangud sini, ginalantaw nga ang iban ang nakabalik na sa ila lugar sa Barangay 27.
Dugang pa ni Mayo nga ang isa sa maayo nga outcome sa clearing amo ang sang nagligad nga footwalk nga nagalapad lang sang 1.5 meters subong ang mahimo na maagyan sang salakyan.
Aminado man si Mayo nga malawig-lawig pa ang proseso antes nga makabalik gid ang mga fire survivors sa Barangay 27.
