Nagalaom ang grupo sang manughimo sang palupok nga magadamo ang magabakal humalin Disyembre 20 tubtob na sa 31.
Sa interview sang Bombo Radyo Bacolod kay Navarro Baylon, presidente sang Hinigaran Firecracker Manufacturers, Dealers and Retailers Association, sa karun gamay pa lamang ang mga nagabakal nga retailers kag kalabanan ang nagacanvass pa lamang sang presyo.
Nagalaom ang mga ini nga amat-amat na nga magadamo ang manugbakal sumugod sa Disyembre 20.
Pasalig sini nga sila ang nagabaligya lamang sa mga retailers nga may permit kag kilala naman sang mga ini ang kalabanan sa mga retailers sa Negros Island.
Magluwas sa mga retailers sa Negros, una na nga nagbakal sa ila ang mga retailers gikan sa Region 7 kag may-ara pa sang gikan sa Region 8.
Sa masami dala sang mga ini ang ila lisensya sa pagbaligya kag personal nga nagapadulong sa ila nga pwesto sa banwa sang Hinigaran.
Pahayag ni Baylon nga may guidelines sa kadamuon sang chemical ukon pulbora nga mabutang sa kada palupok kag sila ang estrikto nga nagasunod diri agud legal ang ila nga pagbaligya.
Aminado man ini nga dyutay ang stocks sa karun bangod pa-untat untat ang ila nga paghimo.
Ini tuga sang kulang-kulang nga mga raw materials kag indi palarehas nga schedule sang deliveries.
Suno kay Baylon, bangod nagsaka ang presyo sang raw materials, may gamay man nga pagsaka sa presyo sang palupok.
Panawagan sini sa mga consumers nga seguruhon nga sa legit manufacturers ukon retailers makabakal kag indi sa mga fly by night sellers.
Samtang importante man nga basahon ang instructions sa packaging sang mga palupok agud makalikaw sa disgrasya subong nga paskwa kag bag-ong tuig.
