Nagdangat sa pito ang narekord nga mga biktima sang firecracker related incidents sa ciudad sang Bacolod.
Sa interview sang Bombo Radyo Bacolod kay Executive Assistant to the Mayor Ernie Pineda, ginpahayag sini nga kapin 60 porsyento ang gin-nubo sang kaso sang mga firecracker related injuries sa ciudad sang Bacolod sini nga tuig kun ipaanggid sang tinalikdan nga may yara sang 15.
Sa pinakaulihi nga data sang Task Force Paputok, pito ang narekord nga FRI humalin sang Disyembre 11, 2019 tubtob Enero 1,2020.
Una nga narekord amo sadtong Disyembre 11 kun sa diin ang biktima ang ginkilala kay Shim Adrian Tolentino, 10-anyos sang Brgy. Estefania nga biktima sang boga.
Ginsundan ini sang Disyembre 26 ni Ezekiel Jarabe, 14-anyos sang amo man nga barangay nga biktima naman sang whistle bomb.
Ruh Jihn Vargas, 12-anyos sang Barangay 16 nga nalukpan sang triangle sang Disyembre 31; Jasperson Pangadlao, 11-anyos sang Brgy. Mansilingan nga nabiktima sang kamara sang Enero 1; Wilfredo Estrabon Jr., 41-anyos sang Brgy. Punta Taytay nga nalukpan sang goodble Philippines sang amo man nga adlaw; John Gabriel Lipa, 10-anyos kag Kyle Billones, 12-anyos nga lunsay taga-Brgy. Alangilan ang nalukpan sang wala pa matumod nga palupok sang Enero 1.
Suno kay Pineda, ang pagnubo sang kaso sang firecracker related incidents ang nagapakita lamang nga nangin epektibo ang kampanya sang gobyerno nga likawan ang paggamit sang palupok.
Nagalaom si Pineda nga indi na madugangan pa ang numero sang mga biktima sang palupok.
Nagakalipay ang direktor sang Negros Occidental Police Provincial Office nga nangin matawhay ang pagsug-alaw sang probinsya sang bag-ong tuig.
Sa interview kay Police Colonel Romeo Baleros, nangin generally peaceful ang Negros Occidental sa pagsug-alaw sang 2020.
Ini apisar sang pila ka insedente sang binun-anay nga narekord sa palibot sang probinsya.
