Nangin malinong kag matawhay ang pagsug-alaw sang tuig 2023 sa probinsya sang Negros Occidental suno sa spokesperson sang Negros Occidental Police Provincial Office (NOCPPO).
Sa interview sang Bombo Radyo Bacolod kay Police Lt. Judesses Catalogo, wala sang narecord nga dalagko nga mga insidente ang mga kapulisan sa probinsya nga nagtublag sa pagsugalaw sang mga pumuluyo sa bag-ong tuig.
Suno kay Catalogo, wala man sila sang narecord nga stray bullet incident nga ila man gintutukan sa New Years eve.
Ginakabig man sang mga ini nga generally peaceful ang pagselebrar sang bag-ong tuig sa probinsya kag diutay man ang fire-cracker related incident sa probinsya.
Nagdangat lamang sa 13 ang recorded nga fire-cracker related injuries kag ini ang ginalakipan sang Binalbagan-isa; Sagay-isa; EB Magalona-isa; Valladolid-isa; Hinoba-an-isa ; Cadiz- duha; Candoni-isa; Kabankalan-duha; Victorias-isa; Isabela-isa kag Bago- duha.
Suno kay Catalogo, ang mga reported nga nasamaran bangud sa palupok ang lunsay nabulong naman kag nakapauli sa tagsa-tagsa ka puluy-an.
Nagdangat naman sa masobra sa 70 ka bilog nga boga ang nakumpiskar sang mga kapulisan sa probinsya sang Negros Occidental.
Ginalantaw man nga dako ang nabulig sang padayon nga pagpahibalo sa mga pumuluyo sang indi maayo nga dulot sang palupok sa pagpanubo sang kaso sang fire-cracker related injuries sa probinsya.
