Nagapanguna ang banwa sang Hinigaran nga may pito ka mga kaso, ginasundan ini sang mga ciudad sang La Castellana kag Talisay nga may tag-lima ka kaso, Cadiz City nga may apat, Silay City kag Moises Padilla nga may tag-duha ka kaso kag ciudad sang Kabankalan nga may isa ka kaso.
Nagagwa man nga mas manubo sang 25 porsyento ang narekord subong nga tuig nga mga firecracker-related injuries kun ipaanggid sa nagligad nga tuig nga may 36 ka mga kaso.
Samtang, nadugangan pa ang numero sang mga biktima sang palupok kadungan sang pagsug-alaw sang bag-ong tuig nga lunsay ginpangdala sa Corazon Locsion Montelibano Memorial Regional Hospital (CLMMRH).
Gindala sa nasambit nga hospital ang 41-anyos nga si Wilfredo Islabon Jr. 41 sang Purok Abi-abihon, Brgy. Punta Taytay, Bacolod City matapos nga napilasan ang kamot kag tiyan sini bangud sang palupok.
Sa impormasyon nga nakuha sang Bombo Radyo Bacolod, ginpudyot ni Islabon ang kamara nga nga iya gindumdom nga patay na apang hinali lang ini nga naglupok.
Gindala man sa regional hospital ang 12-anyos nga babaye kag 10-anyos nga lalaki nga residente sang Purok 14, Brgy. Alangilan, Bacolod City matapos nga nakaangkon sang pilas sa kamot sang nalukpan sang ginsidihan nila nga polbora.
Suno sa iloy sang 10-anyos, gintipon sang duha ang pulbora sang mga palupok kag ila ginsindihan.
Naglanding man sa regional hospital ang 5-anyos nga residente sang Brgy. Amayco, Murcia matapos nga nalukpan sa kamot sang gintipon sini nga mga nag-umido nga palupok.
Kahapon nga adlaw, may yara na sang siyam ka mga biktima sang nagkalain-lain nga palupok nga narekord sa CLMMRH.
