Naga-umpisa na ang pagdisplay sang nanarisari nga mga palupok sa likod sang Pope John Paul II Tower.
Sa interview sang Bombo Radyo Bacolod kay Melchor Deriada, board officer sa Bacolod Firework Vendors Association, nag-umpisa na ang pagbaligya sang mga firecracker vendors sa designated area sang Desyembre 13 apang sa karun tumalagsahon pa lamang ang nagabakal.
Ginalauman sang mga ini nga matapos ang paskwa sa Desyembre 26 tubtob 31, didto na kag magadagas ang mga magabakal sang palupok.
Sa pagtsekyar sang Bombo News Team, nakapack sa masami ang mga palupok kun sa diin ang triangulo nga 100 pcs ang isa ka pack ang mabakal sa balor P150.
Samtang may-ara naman sang ruberized nga triangulo nga mabakal sa P130.
Ang Lucis ang nagabalor P30 tubtob P35, ang golden spinner ang balor P50 samtang ang katay naman nga triangulo ang mabakal sa balor nga P150.
Suno kay Deriada, ang presyo sang fireworks ang nakadepende naman sa klase kun sa diin may-ara sang balor P300 apang may-ara man nga mabakal sa P10,000.
Pasalig sini nga may-ara man sang ginahatag nga discount sa mga magabakal sang madamo.
Apang pahanumdom ni Deriada nga 18 anyos pasaka lamang ang sarang nila nga mabaligyaan.
Preparado man ang mga kiosko sang fire extinguisher kag mga balas kag tubig, samtang may mga signages man nga nagadumili sa mga customer nga magpanigarilyo kag testing sa mga produkto.
