Nagdangat sa 28 ang kaso sang fireworks related injuries sa Region 6 kun sa diin isa ang gikan sa Bacolod City kag pito ang sa Negros Occidental.
Ginpahayag ni Dr Printzi Ann Suzette Jeroso-Dequito, health promotion unit officer sa Department of Health Western Visayas, kalabanan sa mga kaso ang blast ukon burn injuries kag wala sang kaso sang amputation.
Sa record sang DOH Western Visayas as of November 21 tubtob 27, may 17 nga narecord nga kaso mas manubo sang 29 porsyento kun ipaanggid sa kaangay nga period sang 2022.
Duha ka mga kaso ang narecord gikan sa sentinel hospital sa Bacolod City kag sa probinsya sang Iloilo nga ginalakipan sang isa nga nakaangkon sang eye injury bangod sa boga kag ang isa ang may blast burn ukon nalupkan sang 5-star.
Ang mga biktima ang lunsay lalaki kag naga edad isa ka tuig tubtob 20 anyos.
Sa non-sentinel hospitals, nakarecord sang tatlo gikan sa Capiz, apat sa Iloilo, pito sa Negros Occidental kag isa sa Antique.
May-ara ang walo ka kaso nga nakaangkon sang blast burn ukon paso, pito ang may eye injuries apang dako nga porsyento sang mga kaso ang bangod sa boga nga nagdangat sa 47 porsyento sang mga narecord nga fireworks related injuries.
Ini ang ginasundan sang triangulo, kamara, watusi, baby rocket, bamboo cannon kag flying tiger
Padayun ang kampanya sang DOH sa Iwas Paputok para sa mas healthy kag safe nga pilipinas.
Pasalig pa ni Dequito nga may on-call personnel ang DOH nga incharge sa Christmas kag New Year kun sa diin sila ang ginpaidalum sa code white.
Samtang nakahanda man ang mga sentinel kag non-sentinel hospitals sa paghatag sang serbisyo kun sa diin sila ang may designated area para sa fireworks related injuries.
Ginapanugyan man sang DOH ang community fireworks sangsa individual fireworks agud nga imbes ibakal sang palupok, ang kwarta ang ibakal nalang sang pagkaon sang mga pumuluyo bangod may-ara na sang malawig nga fireworks display nga maga-entertain sa ila.
