Indi magnubo sa 57 ka mga persona sa Ukraine ang nagkalamatay sa una nga adlaw sang Russian invasion sa pungsod.
Sang Huwebes, nagmando si Russian President Vladimir Putin sang wide-ranging attacks sa Ukraine kag gin-igo ang pila ka mga ciudad kag bases gamit ang air strikes ukon shelling kag pagpang-atake.
Nabatian naman ang mga makusog nga mga pagsigabong sa Kyiv, capital sang Ukraine kag iban nga ciudad.
Suno kay Bombo International Correspondent Ramil Isogon direkta sa United Kingdom, ginpahayag sini nga indi magnubo sa 57 ka mga persona ang nagkalamatay, samtang indi naman magnubo sa 169 ka mga persona ang napilasan.
64 naman ka mga Ukranian military facilities ang nagkalaguba, tatlo ka mga command post kag 18 ka mga radar station nga ginakontrol sang Kyiv.
Suno sa alkalde sang Mariupol, tatlo ka mga sibilyan ang nagkalamatay sa eastern port city kag anum ang napilasan sa invasion sang Russia.
Suno sa emergency services, isa ka lalaki ang napatay sa Kharviv region sa eastern Ukraine matapos nagtupa sa isa ka apartment building ang shelling.
Suno sa militay sang Ukraine, ginguba sini ang mga Russian tanks sa dalan malapit sa eastern city sang Kharkiv, kag napatay ang 50 ka mga tropa malapit sa isa ka banwa sa Luhansk region kag napacrash ang anum ka mga Russian warplanes sa nasidlangan nga bahin.
Ginpanginwala naman sang Russia ang reports nga naguba na ang ila aircraft kag armoured vehicles.
Suno naman sa mga Russian-backed separatists, duha ka mga Ukrainian planes ang ila naguba.
Suno sa Ukrainian police, ang Russia ang nakapatigayon sang 203 ka mga pagpang-atake humalin sang nagsugod ang invasion.
Suno sa Russia defence ministry, naneutralised nila ang Ukranian military airbases kag ang air defence systems.
Ginpahayag man sini nga 74 ka mga above-ground military infrastructure facilities sa Ukraine lakip na ang 11 aerodromes.
