May mga tawo nga medyo overweight ang luyag nga magbuhin sang kabug-aton apang natamad mag-exercise.
Apang paano kun may yara ka sang makuha nga padya kun ikaw ang magsulod sa gym kag natigayon nga mabuhinan ang imo nga kabug-aton?
Sa China, nangin topiko sang mga tawo ang isa ka gym bangud sa controversial offer sini para sa mga members.
Sang damlag lang, gin-anunsiyar sang gym sa Binzhou City sa Shandong Province nga ihatag sang tag-iya ang iya Panamera nga salakyan bilang premyo sa una nga tawo nga makabuhin sang 100 pounds sa sulod sang tatlo ka bulan.
Agud makapasakop, dapat anay magbayad sang 10,000-yuan ukon masobra P82,000 kag mapakilo antes ang weight loss process.
Sa mandatory fee, nalakip diri ang tatlo ka bulan nga intensive training, accommodation kag pagkaon.
Nagapadayon subong ang registration kag magasirado kun may yara na sang 30 ka partisipante.
Apisar madamo ang nakalangkag sa promotion sang gym bangud sang tsansa nga magdaog sang luxury sports car samtang mabuhinan ang kabug-aton, madamo naman nga eksperto ang nagkwestiyon sini bangud mabutang sa risgo ang kabuhi sang tawo.
