Personal nga ginpadulungan kag gin-inspection ni Negros Occidental 3rd District Representative Javi Benitez ang naguba nga flood mitigation project sa Barangay Pasil banwa sang EB Magalona, Negros Occidental.
Suno kay Benitez ang nasambit nga proyekto ang nagalaba sang 900 meters kag may contracted price nga P93 million.
Suno diri, sa nasambit nga proyekto may yara na sang naguba kun sa diin gina-ab ab na sang tubig.
Dugang pa sini ang proyekto ang nahuman sang Hulyo 2020.
Nagpanugyan si Benitez sa kontraktor nga kay-uhon ang flood mitigation project sa mas madali nga panahon kag kun mapaslawan igaduso sini nga indi na pag-ilakip ang kontraktor sa maabot nga proyekto.
Apang ginpahayag man sini nga maayo man ang nasambit nga proyekto apang ang problema lamang nga may yara ini sang porsyon nga naguba na.
Sa record sang DPWH, Supreme ABF Construction kag Silvergraces Construction ang kontraktor sang proyekto.
Dugang pa ni Benitez, dapat nga wala sang gastuhon ang gobyerno sa pagpakay-o sang naguba nga flood control project.
Nagpasalamat man ini sa mga pumuluyo nga aktibo nga nagapadangat sang mga reklamo sa opisyales sang gobyerno agud nga masolusyunan.
Ginbisitahan man sini ang flood mitigation project sa ciudad sang Silay kasubong man sa ciudad sang Talisay.
