Ginsuguran na ang pagkay-o sa revetment wall sa Purok Malinong, Barangay 40, Bacolod City nga naguba kasunod sang mabaskog nga pag-ulan dala sang Bagyo OPONG kahapon sang kaagahon.
Sa interview sang Bombo Radyo Bacolod kay Purok official Mervin Parar, nawasak ang ginabanta napulo ka metro nga bahin sang revetment wall kapin alas-5:00 kahapon sang kaagahon.
Suno diri, nabatyagan sang nagapuyo malapit sa lugar ang gamay nga pagtay-og, kag sang gintsekyar didto na nagbungad sa ila ang nawasak nga flood control project.
Suno sa opisyal, Setyembre nakaligad nga tuig lamang natapos ang proyekto, kag ini ang wala man sang kabilya.
Ginalantaw ni Parar nga mahimo naghumok ang duta nga pundasyon bangod sa mabaskog nga mga pag-ulan, gani nagcollapse.
May duha ka tawo naman kahapon nga nagtsekyar sa area, nga sa pagkadumdom sini, amo man ang mga nagtrabaho sa proyekto sadto.
Sa pagpadulong sang Bombo News Team sa area kaina, naabtan man nga may mga kalalakinhan nga nagamiksla sang semento nga gamiton sa pagkay-o sang naguba nga flood control project.
Nagalaom naman si Parar nga makay-o gilayon ang naguba nga proyekto agud indi mangatubang sang problema sa baha ang mga pumuluyo sa lugar.
