Ginabanta yara P6 billion ang pondo nga kinahanglanon para sa flood control projects sa ciudad sang Bacolod.
Suno kay House Deputy Speaker kag Bacolod Lone District Representative Alfredo “Albee” Benitez wala pa na-finalize ang tanan nga mga proposal gani naga-apelar siya sa tanan nga goverment agencies nga pondohan kag hatagan sang prayoridad lamang ang mga flood control projects nga gintalakay kag ginkasugtan sa Flood Mitigation Summit.
Suno kay Benitez, may yara na sang mga short, medium kag long-term solutions nga na-identify.
Suno diri, isa sa mga ginakabig nga prayoridad amo ang Mandalagan River kag Banago River, bangud ini nga mga suba ang masami nga nagalapaw kun mabaskog ang ulan kag nagatuga sang pagbaha.
Paathag ni Benitez nga ginkakas sang nakaligad nga mga bulan ang tanan nga flood control projects agud ma-usisa kun ano gid nga proyekto ang kinahanglanon nga pondohan.
Suno diri, kalakip sa nagadeterminar indi lang ang DPWH, DENR, government agencies kundi kasubong man ang mga Local Government Unit, stakeholders kag ang mga pumuluyo.
Pahayag sini nga sa karun, ginahulat nalang nga ma-aprubahan ang amo nga proposal.
