Ginkumpirmar ni Bacolod City Mayor Alfredo “Albee” Benitez nga wala nalakip sa nahatagan sang budget sa 2025 General Appropriations Act ang pagtukod sang tatlo ka flood gate kag pumping station sa Bacolod City.
Sa pahayag sang alkalde ginpalos ang nasambitan nga proyekto sa nahatagan sang pondo sa Bicameral Conference Committee.
Suno diri P300 million ang ginpropose nga budget para sa tatlo ka flood gate kag pumping stations sa idalom sang Department of Public Works and Highways (DPWH).
Ang tatlo ka flood gate ang itukod sa Mandalagan River, Magsungay River kag Lupit River.
Nahibaluan nga lima ang kabug-usan nga plano nga itukod nga flood gates apang tatlo pa lamang ang nahimuan sang program of works kag ginpropose sa 2025 GAA.
Suno kay Benitez, nakighinun-anon na ini kay President Ferdinand “Bongbong” Marcos Jr, kag iya gin-eksplikar ang importansya sang nasambitan nga mga proyekto.
Ini bangod indi na niya luyag nga masulit ang nakaligad nga mga problema sang pagbaha sa pila ka bahin sang ciudad.
Bangod sa positibo nga response sang Presidente, nagapati ang alkalde sa commitment sini nga mapangitaan sang pondo ang proyekto.
Paathag ni Benitez nga indi lamang Bacolod City ang nakuhaan sang budget bangod may iban man nga mga local government units nga nadulaan sang budget para sa mga critical kag crucial projects.
Samtang aminado naman ang district engineer sang DPWH – Bacolod City nga normal lamang nga may mga proyekto nga indi mapondohan.
Sa interview sang Bombo Radyo Bacolod kay Engr. Leah Jamero, antes paman ang commitment ni Presidente Marcos kay Mayor Albee, ginlakip na nila ang proyekto sa mga iga-endorso sa 2026 budget proposal.
