Tinutuyo sang Bacolod City Government nga magbutang sang flood gates kag pumping stations sa mga water ways agud nga masolusyunan ang pagbaha sa ciudad.
Ang flood gates ang ibutang sa Magsungay, Lupit kag Mandalagan river kasubong man sa Banago creek.
Suno kay Bacolod City Mayor Alfredo “Albee” Benitez, may yara man sang pila ka mga Japanese consultants ang nagalibot sa ciudad agud nga matumod kun ano ang maayo nga solusyon sa pagbaha.
May yara na sa karun sang program of works ang Department of Public Works and Highways (DPWH) para sa pagbutang sang flood gates kag pumping stations sa pila ka mga suba kag creek sa ciudad agud nga malikawan na ang pagluntad sang baha.
Magacoordinate lamang ang DPWH sa city government sang Bacolod para sa nasambit nga proyekto bangud ang nasambit nga ahensya man ang nagaduso nga makakuha sang P500 million nga pondo sa national government.
Sa tion nga magkulang ang budget bukas man ang ciudad sa investment agud nga matigayon ang proyekto.
Ang Asian Development Bank (ADB) kag Japan International Cooperation Agency (JICA) ang nagpahayag naman nga magabulig.
Gin-athag man ni Benitez nga ang P500 million ang para lamang sa paginstall sang flood gates nga may pumping stations agud nga masolusyunan ang pagbaha sa ciudad sang Bacolod.
