Ginapakamaayo sang mga nagabaligya sa Libertad Central Market nga natinluan kag indi na madanlog ang dalan matapos ang flushing activities kagab-i.
Sa interview sang Bombo Radyo Bacolod kay Alyas Marivic, fruit vendor sa Libertad Public Market, halin sa umpisa sang flushing activity yara gid si Bacolod City Mayor Greg Gasataya kag ini ang ulihi pa nga naghalin bangod ginlibot gid sini ang merkado.
Indi lamang ang sulod sang merkado kundi ang Arnaez Street pasulod sang merkado ang ginbombahan sang firetruck sang tubig.
Nasaksihan mismo sang Bombo News Team ang pagbag-o matapos ginpadulungan ang merkado kaina sang aga, kun sa diin wala na sang naga-usbong nga baho, magluwas sa mismo nga merkado, kag indi na madanlog ang dalan.
Ini bangod sa mga waste materials gikan sa mga karne, mga nagakadunot nga utanon nga nagalapta sa dalan, ini ang nagadanlog sa tion nga mabasa.
Apang bangod sa makusog nga pressure sang firetrucks, nagkalapalos gid ang madamol nga higko sa dalan.
