Ginkumpirmar ni Punong Barangay Yolanda Noble sang Barangay Pahanocoy nga naglisensya sa iya si Dinnis Parcon, tag-iya sang Dinmark Resort, nga magapatigayon ini sang grand opening sa iya nga resortsa Sitio Aning sa amo nga barangay.
Nahibaluan nga gina-imbestigahan na karon sang Bacolod Emergency Operations Center ang gina-alegar nga “foam party” matapos nga navideohan ang mga tumalambong nga wala nagasuksok sang face masks samtang nagasaot.
Sa interview sang Bombo Radyo Bacolod kay Noble, ginpahayag sini nga ginpasugtan niya si Noble kag ginpahanumduman ang tag-iya nga mag-obserbar gid sang health protocol.
Nagpadala man ini sang barangay tanod sa lugar agud magbantay.
Suno sa Punong Barangay, atubangon nalang ni Noble ang mga konsekwensya bangud nga wala man sila nagkulang sa pagpahanumdom.
Samtang, ginkumpirmar man ni Vice Mayor El Cid Familiaran nga pagkatapos niya makabaton sang mensahe angot sa foam party nagligad nga semana, gilayon niya nga gintawgan si Noble agud kumpirmahon ang isyu.
Liwat naman nga nagpanugyan ang bise alkalde sa tanan nga dapat magsunod gihapon sa ginapatuman nga health protocol bangud nga yara pa ang virus kag indi dapat magpakampante ang tanan.
