Nagapadayon ang follow-up investigation sang kapulisan matapos ang nagluntad nga engkwentro sa Sitio Napungalan 2, Brgy. Jonob-jonob, Escalante City sang nakaligad nga adlaw, kun sa diin patay ang tatlo ka High Value Individual kalakip ang isa ka drug group leader nga ginkilala kay alyas Bindoy matapos magbato sa otoridad sang serbihan ini sang warrant of arrest.
Sa interview sang Bombo Radyo Bacolod kay Police Lt. Col. Florendo Fajardo, hepe sang Escalante City Police Station, nagapati ang mga otoridad nga madamo pa nga katapo sang imbolbado nga drug group ang nabilin sa nasambit nga lugar.
Suno kay Fajardo, ang isa ka katapo nga ginapatihan ‘next in line’ kay Bindoy ang yara subong sa ospital kag na-ospital arrest samtang nagapabulong.
Ginpahayag man ni Fajardo nga sila ang nakibot sang ila nakit-an ang pilason nga myembro sang grupo ni Bindoy bangud ang nasambit nga persona ang anay subject person man sang drug buybust operation nga nakapalagyo sadto nga tion.
Suno diri, ginapatihan nga ang lugar ang ginahimo nga “safe haven” sang grupo kag posible may yara man sang kuta sang makawala nga grupo.// Dugang pa, gina-alegar nga gina-proteksyunan sang mga rebelde ang grupo ni Bindoy.
Ginpahayag ni Fajardo nga malapad ang sakop sang iligal nga aktibidad sang grupo nga ginabutang sa peligro ang komunidad, kag natukiban sang mga otoridad nga may mga menor de edad nga imbolbado man sa mga iligal nga operasyon.
Sa karon, ginapatigayon na ang clearing operations sa nasambit nga sitio kag ginpahayag nga indi pa luwas ang lugar.
Kaupod man sa imbestigasyon ang Philippine Drug Enforcement Agency-Negros Island Region (PDEA-NIR), Special Action Force (SAF), kag 79th Infantry Battalion sang Philippine Army.
