Nagdangat sa 548 ang mga food delivery riders nga nakigbahin sa surveillance testing nga ginpatigayon sa Bacolod Arts and Youth Sports Center sang Sabado tubtob kahapon.
Suno kay Executive Assistant to the Mayor Ernie Pineda, ang head sang Extraction Team sang Emergency Operation Center sang Bacolod, 81 tanan ang nakigbahin sa surveillance testing sang Sabado samtang 457 naman ang nakigbahin kahapon.
Ginapasalamatan naman ni Pineda nga madamo ang namati kag nagsunod sa mga drivers gani halos malab-ot na ang target nga 579.
Suno diri, matapos ang tetsing ginahatagan man sang mga sticker nga Surveillance Testing Compliant ang mga drivers.
Panugyan ni Pineda nga mas maayo kun magorder sa mga may sticker agud nga makaseguro nga hilway ini sa COVID-19.
Ginapasalamatan man sini ang Bombo Radyo Bacolod sa pagbulig sa pagkampanya natuhoy sa programa kag pagpaathag sa kabilidhun sini.
Sa mga naulihi naman sa pagpakigbahin sa surveillance testing nga mga food delivery driver, ginapanugyan ni Pineda nga sarang pa ini nga buhaton sa maabot nga Sabado kag Dominggo.
Ginalantaw naman nga sarang na mabal-an ang resulta sang test sa maabot nga Miyerkules ukon Huwebes.
Naka-schedule naman nga tingob nga dal-on sa laboratoryo sa Cebu bwas ang mga swab samples samtang gilayon naman nga iga-send sang laboratoryo ang mga resulta pinaagi sa email.
Suno kay Pineda, gilayon nya nga mahibaluan bilang pinuno sang extraction team kun positibo ukon negatibo ang resulta sang mga test, samtang ginpaathag man sini nga ang indi nila malawagan ang nagakahulugan lang nga negatibo.
Gilayon nga ipadala ang mga certificate gikan sa laboratoryo agud nga ihatag sa mga pasyente.
Aminado naman si Pineda nga may kabudlayan kun matukiban nga nagasuprer sang virus apang sarang ini nga malampuwasan.
