Ginpanindugan sang representative sa business sector nga mas kinahanglan nga suportahan ang food production sangsa magpatuman sang wage increase.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry (MBCCI), kaangay nga ginatalikdan lamang ang matuod nga problema.
Paathag ni Carbon nga Food Insecurity ukon kakulangan sang produksyon sang pagkaon ang pinakadako nga problema sang pungsod.
Kabaylo sini ang pungsod ang nagabakal sang mga imported nga produkto nga mas nagalupog pa sa lokal nga produksyon.
Panawagan sang negosyante sa gobyerno nga magtukod sang task force nga magatutok sa pagbukas sang mga bogeda.
Ini bangod dako ang posibilidad sang hoarding ukon pagtago sang supply sang bugas kag paggwaon na lamang kun magmahal na ang presyo.
Dugang pa sini nga dapat dulaon naman ang middleman kag ang mga produkto gikan sa local farmers ang baklon mismo sang gobyerno, ukon magpatuman sang government to government processes.
Ini bangod dako ang risgo sang kurapsyon kun pribado nga sektor ang maga-uyat sang responsibilidad.
Ginapangabay sini nga una nga matutukan sang gobyerno ang irrigation system kag flood control project.
Ini bangod tuman ang kahalitan sa sektor sang agrikultura kun sa kada tion nga may bagyo ukon mabaskog ang ulan, gilayon man nga nagabaha.
Isa sa karun sa ginakahangaw-an ang pagbalik ni Bagyo Kristine bangod sa Fujiwara effect kag pagsulod ni Bagyo Leon.
Suno diri, sulit-sulit lamang ang problema sa kada tuig, samtang halos lima tubton napulo ka tuig naman nga wala nakapatigayon sang irrigation system kag flood control projects.
