Ginakonsiderar sang Department of Social Services and Development (DSSD) sang Bacolod nga indi na maglakip sang istant noodles sa family food packs nga ginapanagtag sa mga pumuluyo.
Ini ang kasunod sang reklamo sang pila ka mga residente nga expired na ang noodles nga ila nabaton halin sa city government.
Sa interview sang Bombo Radyo Bacolod kay DSSD head Pacita Tero, gin-ako niya nga wala nila mabukaran ang mga foodpacks nga nakabutang sa naidalom nga bahin sang gintangkas sa warehouse gani wala makita nga nag-expire na ang mga noodles.
Suno kay Tero, pinutos na nga daan ang mga foodpacks kag wala man ini nakahibalo kun gintungtong ini sa kahoy agud indi maghulas bangud sa init nga nagikan sa salog sang gym sang eskwelahan.
Suno kay Tero, ang foodpacks ang kaangay lamang sang ginpanghatag sa mga balay nga apektado sang lockdown sadtong ginpaidalom ang syudad sa Enhanced Community Quarantine (ECQ).
Gindumdom nila nga ang food packs ang sarang pa makaon gani ginpanghatag man ini gilayon.
Suno diri, ang mga noodles ang islan nila apang ang bugas ang indi na maislan bangud kuhaon man ini sa gihapon sa National Food Authority (NFA).
Suno pa diri, ang mga noodles ang indi man dulungan nga ginbakal.
Nagpanawagan si Tero sa tanan nga nakabaton sang expired nga makig-angot lang sa barangay agud mapalab-ot sa opisina sini kag maislan.
Nakig-angot naman ang DSSD head sa Department of Social Welfare and Development Region 6 kag nagpanugyan ini nga ipaiway na ang paglakip sang noodles sa foodpacks bangud malip-ot lamang ang shelf life sini.
