Nag-champion ang football team sang San Carlos City, Negros Occidental sa Silver Phase Under 12 Category tournament nga ginpatigayon sa Madrid, Spain.
Sa interview sang Bombo Radyo kay Francis Roy Barcoma, head coach sang San Carlos City football Team, ila naatubang ang team sang USA kag Canada kag iban pa, kag apisar nga dako ang deperensya sa height kag may adjustment sa temperatura, wala nagpapierde ang San Carlos team.
Suno diri, tatlo ka bulan antes ang tournament nagpreparar na sila kag nangin maayo ang resulta.
Suno kay Barcoma, ang mga players ang lunsay mga estudyante sang public schools sa ciudad kag tanan ang nangin maisog sa pagbato sa kontra.
Todo suporta naman ang mga ginikanan sang players kasubong man ang Local Government Unit nga naghatag sang P20,000 cash sa kada players kag coaches.
Sa karun magapreparar naman ang team para sa tournament nga patigayunon sa Vietnam kag Thailand.
