Force multiplier, patay matapos sa banwa sang Binalbagan; Karbaw, may igo man sang bala

Patay ang isa ka force multiplier kag mangunguma matapos gintiro sa Sitio Capaklan, Brgy. Santol, banwa sang Binalbagan, pasado alas-7:00 kahapon sang aga.

Ginkilala ang biktima nga si Jolito Arnado, 55-anyos nga residente sang nasambit nga lugar.

Suno kay Police Executive Master Sergeant Rex Tejares, Municipal Executive Senior Police Officer sang Binalbagan Municipal Police Station, samtang nagapang-arado ang biktima sa kampo, hinali lang ini nga gintiro.

Nakaagom si Arnado sang igo sang bala sa ulo, dughan kag iban pa nga bahin sang iya lawas nga nagresulta sang iya kamatayon.

Naigo man sang bala ang karabaw nga gingamit sini sa pag-arado.

Padayon pa mga ginatumod ang suspect kag motibo sa krimen.