Ginpahayag sang hepe sang Hinigaran Municipal Police Station nga sa Barangay Sum-ag, Bacolod City nagluntad ang aksidente kun sa diin nakabunggo ang suzuki carry nga ginamaneho ni Constantino Canoy alyas JR sakay si Police Corporal Nestor Madelo sang Sabado sang gab-i.
Domingo sang aga, nasapwan nga wala na sang kabuhi si Madelo, nakadestino sa Bacolod City Police Station 5 sa higad sang dalan sa Bangga Acas, Barangay Pilar, Hinigaran, Negros Occidental.
May yara sang pilas ang biktima sa nawala nga guya kag iban nga magagmay nga pilas sa pila ka bahin sang iya nga lawas.
Sa karun wala pa matumod kun ano ang gintunaan sang pilas sang biktima apang ginasuspetsuhan nga gintuga sang armas-luthang.
Sa interview sang Bombo Radyo kay Police Captain Ryan Villasario, nagikan si Canoy kag Madelo sa Bantayan, Bago City kun sa diin nagapuyo ang mga ginikanan ni Madelo bangud nagbulang ang mga ini kag pasado alas 11:00 sang gab-i nagbyahe sila padulong norte sang nabungguan sini ang truck nga may karga nga tubo sa Barangay Sum-ag.
Matapos ang aksidente, nagbalik pa sa south ang ginaalegar suspetsado kag ginbilin ang bangkay sa Hinigaran kag nagbalik sa Barangay Granada, Bacolod City.
Nagapati ini nga ang imbolbado sa nagluntad nga aksidente sa Barangay Sum-ag sa kaangay nga gab-i ang salakyan ni Canoy.
Pagresponde sang kapulisan sa lugar, wala na ang mga salakyan.
Sa karun, yara si Canoy sa kustodiya sang Hinigaran Municipal Police Station.
Gin-athag man sini nga indi tanod si Canoy kundi force multiplier. Samtang, ginpahayag ni Police Captain John Christopher Masangkay, station commander sang Bacolod Police Station 5, nga off duty si Police Corporal Nestor Madelo sang nabungguan sang salakyan sini ang truck nga nagakarga sang tubo.
Sa karun, ila ginakabig nga person of interest ang force multiplier nga si Constantino Canoy alyas JR.
Yara naman sa ila kustodiya ang Suzuki carry nga nakaangkon sang substantial damage.
Sa karun ginahibalo pa kun gunshot wound ang pilas nga naagom sang biktima.
Narecover sa lugar kun diin nasapwan ang biktima ang isa ka magazine sang calibre .9mm samtang wala naman nakit-an ang issued firearm sini.
Ginakabig naman nga katingalahan sang iloy ni Madelo kun ngaa wala nagbalik sa Bago City si Canoy kag gindala ini sa ila kustodiya ukon gindala sa ospital ang iya bata kun sila ang naaksidente.
Suno kay Lila Madelo, natingala ini kun paano naglab-ot sa Hinigaran ang carry ni Canoy kag kun ngaa didto niya pa gindala ang bangkay sang pulis.
Suno diri, apat tanan ang iya mga kabataan apang sa mga ini, si Madelo ang pinakamabuot.
Samtang ginmanduan naman ni Brigadier General Roderick Augustus Alba, tagpamaba sang Philippine National Police ang tagpamaba sang Police Regional Office 6 nga si Police Lt. Col. Arnel Solis nga abisuhan si PRO 6 Regional director Brigadier General Flynn E. Dongbo sa ngalan ni PNP Chief Police Gen. Dionardo Carlos nga imbestigaran sang maayo agud mahatagan sang hustisya ang kamatayon ni Police Corporal Nelson Madelo.
Ginpahayag man ni Alba nga ang Philippine National Police ang nagaupod sa kalisod sang pamilya kag abyan sang biktima.
