Nagpatuman na sang forced evacuations sa mga areas nga apektado sang lapnagon nga wild fires sa Southern California, sa Estados Unidos.
Sa interview sang Bombo Radyo Bacolod kay Bernie Sarabia, Bombo International News Correspondent derekta sa California, ang kalayo ang nag-umpisa lamang sa grass fire.
Apang bangod sa mabaskog nga Sta. Ana Winds, madasig nga nagdako ang kalayo.
Suno kay Sarabia, madamo sang natupok nga residential areas, mga mansyon kag bisan mga historical structures kaangay sang museum.
Sa inisyal nga report may lima na nga nagkalamatay apang suno kay Sarabia, ginahulat pa nila ang dugang nga detalye sa ginkamatay sang mga biktima.
Paathag sini nga madamo man sang retirement homes sa nasambitan nga area.
Sa karun, nagapatuman na sang forced evacuations sa mga apektado nga lugar agud indi na mabutang sa risgo ang mga rescuers kun may-ara gihapon nga salarbaron bangod sa indi pagbiya sa puluy-an.
Nagabuligay man ang pila ka fire departments agud mapalong ang kalayo.
Paathag ni Sarabia nga magluwas sa LA County, may duha pa ka nagluntad nga separado nga wild fires.
May mga abyan nga Pilipino man ini malapit sa area sang sunog, nga gin-abisuhan naman nga magpreparar para sa evacuation kag gin-offer man sini ang iya balay, bilang temporaryo nga matiniran.
Panawagan ni Sarabia sa tanan nga magbulig sa pagpangamuyo nga mapalong na ang wildfires kag wala sang dugang nga mangin biktima.
