Ginpasakaan sang kaso nga attempted murder ang isa ka foreign national matapos sini ginlabo ang duha ka mga kaupdanan sini sa boarding house sa Block 15, Lot 15, Easthomes 1, Barangay Estefania, Bacolod City.
Ang suspetsado ang isa ka American citizen nga ginkilala nga si William Joseph Safford, 60 anyos, wala sang trabaho kag tumandok sang West Virginia, USA.
Samtang ang mga biktima ang maglive-in nga sanday Jon Martin Antonio, 36 anyos, advertising fabricator kag Ma. Antonette Gillegao, 23 anyos, hair stylist.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, atubangay lamang ang kwarto nanday Safford kag sang maglive-in.
Sa imbestigasyon, may dumot ang foreign national bangod hinali nga nagtaas ang bill sang iya kuryente kag ginapasibangdan sini ang maglive nga nagatap sa iya kontador.
Nahibaluan nga tagsa ka kwarto ang may kinaiya nga kontador sang kuryente.
Ang mga biktima ang ginsulong sang foreign nationals sa ila nga kwarto dala ang binangon kag gilayon sini nga ginlabo-labo ang magpartner.
Nahimo man nga maagaw ni Antonio ang binangon kag nabalusan ang suspect gani ini ang nakaangkon man sang samad sa abaga.
Sa karun padayun nga ginabulong sa ospital ang duha ka biktima nga yara naman sa estable nga kondisyon samtang si Safford ang nakahunong na sa Bacolod Police Station 4 kag padayun man ang medical treatment samtang yara sa prisuhan.
Ginpahibalo naman ang US embassy sa Pilipinas kun ang foreign national ang kinahanglan nga ideport sa Estados Unidos.
