Patay ang isa ka foreman matapos ginluthang sang iya nga trabahador sa Punta Galaxy Street, Henrieta Village, Barangay Singcang-Airport, Bacolod City sang domingo sang hapon.
Ang biktima ang ginkilala kay Aldren Aquino, 30 anyos, kasado, residente sang Purok Malapitan, Brgy Alijis, Bacolod City.
Samtang ang suspetsado naman ang ginkilala kay Joshua Montaño, 45 anyos, residente sang Purok Kaingin, Brgy Singcang Airport sa nasambit nga ciudad.
Sa interview sang Bombo Radyo Bacolod kay Police Captain Greeky Cayao ang station commander sang Bacolod Police station 8, ang biktima ang nagpadulong sa balay sang suspetsado agud nga komprontahon sa mga nagkaladula nga grinder kag electric drill nga ginagamit sa ila gina-ubrahan nga istraktora.
Dugang pa ni Cayao nga may nagluntad nga pagbaisay sa duha, kag sang naglakat na ang biktima siya ang ginsundan sang suspetsado dala ang Cal. 38 revolver.
Nagpanaog pa ang biktima sa iya nga motorsiklo kag magapalapit kuntani sa suspect apang hinali lang ini nga gin-tiro kag naigo sa iya dughan.
Gindala pa sa ospital ang biktima apang gindeklara nga dead on arrival.
Padayon man ang pagpangita sang Bacolod Police Station 8 sa suspetsado.
