Ginpanindugan ni former 3rd District Board Member Patrick Leonard Lacson nga masarangan sini ang pagpamuno sa Bacolod Traffic Authority Office (BTAO) pinaagi sa gintukod nga team.
Sa interview sang Bombo Radyo Bacolod kay Lacson, aminado ini nga indi niya masarangan kun siya ang naga-isahanon apang kampante ini nga mapamunuan niya ang ahensya sang husto sa bulig sang gintukod sini nga council.
Ini ang kasunod sang pagpangduhaduha sang iban nga mga pumuluyo, nga indi masarangan ni Lacson ang magpamuno BTAO bangod ini ang ginalakipan sang robo-robo nga trabaho nga wala naandan sang panibag-o nga BTAO Head nga nagdako sa may kwarta nga pamilya kag bata ni anay Negros Occidental Governor Daniel “Bitay” Lacson.
Apang panindugan ni Lacson nga indi function sang Department Head ang robo-robo nga trabaho, kundi ang pagseguro sang flow sang budget, mga kinahanglanon sang traffic enforcers, pagsulod sang kwarta sang traffic violators, paano maseguro nga wala sang cancelled tickets, madula ang kurapasyon sa sulod sang ahensya kag madamo sang iban pa.
Pasalig sang BTAO Head nga bangod indi ini eksperto sa batas trapiko, nag-appoint naman ini sang field ukon operations commander kag sa karun nakita sini nga may-ara man sang “sound management”.
Apang aminado ini nga subong pa lamang nga adlaw magabalik ang regular nga operasyon sang BTAO matapos ang malawig-lawig nga bakasyon dala sang eleksyon kag tigkalalag.
Ginpasalig man ni Lacson nga welcome sa iya opisina ang tanan nga constructive criticism, valid opinions ukon mga komento sang pumuluyo.
Wala naman sang problema sa iya kun mag-abot ang tion nga kinahanglan ini nga magpatunga sa dalan agud magderiher sang trapiko bilang pagpanguna sa iya mga tawo.
Pasalig sini nga obrahon niya ang nagakaigo nga trabaho nga makabenepisyo sa mga pumuluyo samtang seguruhon man sini nga mapaigo ang budget sang ahensya. SAMTANG… Aminado si Bacolod Traffic Authority Office (BTAO) Head Patrick Leonard Lacson nga kun luyag sang zero-corruption, ini ang dapat umpisahan gid sa ibabaw.
Sa interview sang Bombo Radyo Bacolod kay Lacson, wala na ini nagbuya pa sang panan-awan sa mga alegasyon sang kurapsyon sa BTAO bangod ini ang iya na nga ginatugyan sa mga abogado.
Apang kun matuod-tuod ang alegasyon nga nakadangat sa iya, dako nga temptasyon ang gina-alegar mabulsa nga P300,000 kada bulan ukon P3 million sa sulod sang 10 ka bulan.
Apang panindugan sini nga agud indi matemptar sa kwarta, kinahanglan ang commitment sa pumuluyo kag dapat nga panindugan ang prinsipyo.
Aminado man ini nga kun kaisa, mabudlay gid man ang magbalibad sa mga naga-ayo nga violators gikan sa mga personnel sa idalom tubtob na sa ibabaw, gani may iban nga ginapalusot na lamang.
Apang pahanumdom sini nga magapanabat ang mga personnel kun iya madakpan.
Dugang pa sini nga kun ang kurapsyon ang nagikan naman sa ibabaw sang management kag ini ang nahibaluan sang mga traffic enforcers, mabudlayan ang paghatag sang penalidad sa mga pasaway nga empleyado kun mismo ang nagapamuno ang may-ara sang ginatago.
Gani nakita sini nga dapat ang implementasyon sang zero-corruption ang maga-umpisa gid sa upper-management.
Bangod luyag ni Lacson nga mangin transparent sa publiko ang pagsulod kag gwa sang budget gani iya man ini nga ipaskil sa kaugalingon sini nga social media ukon sa website sang BTAO.
Pamatud-an man sini nga kun may-ara sang political will, mahimo sini nga mapatuman ang target nga zero corruption sa ahensya. Sa pihak nga bahin, Naga-ayo sang dugang nga tiyempo ang bag-o nga pinuno sang Bacolod Traffic Authority Office (BTAO) antes mapresenter ang management structure, organizational charts kag agenda kay Bacolod City Mayor Alfredo “Albee” Benitez.
Suno kay BTAO Head Patrick Leonard Lacson, indi sini luyag unahan ang alkalde sa pagpagwa sang agenda sa publiko bangod hinali nga siya ang magpagwa sang 10-point agenda apang tatlo lamang ang maaprubahan sang Sangguniang Panlungsod, nakita man sini nga madismaya ang publiko.
Pasalig ni Lacson nga sa iya nga pagpresentar kay Benitez, nahibaluan na sang mga ini kun ano ang kulang.
Suno diri, sa karun may 300 ka personnel ang BTAO apang 20 tubtob 30 diri ang indi traffic enforcers.
Luyag nga ipropose ni Lacson sa alkalde nga himuon na lamang nga enforcers ang 300 ka personnel allocations samtang ang gintukod sini nga 6-man team amo na lamang ang magaserbe nga administrative personnels.
Dugang pa sang BTAO Head nga indi man niya luyag nga maglabay pa sa ila ang kwarta, gani igatugyan sini nga madigitalize ang payment pinaagi sa QR Code agud nga magaderetso na lamang ang kwarta nga magasulod sa Bacolod City Treasurer’s Office sa Bacolod City Government Center.
