Ginpamatbatan nga guilty si former Bacolod City Mayor Luzviminda “Joy” Valdez kag ang iya aide angot sa pagpeke sang kapin pito ka cash slip, kag pagpadako sang reimbursement expenses sa P364,778 gikan sa dapat P2,000 lamang.
Ini ang santo sa 114-page decision nga ginpagwa sang 6th Division sang Sandiganbayan.
Natumod sang anti-graft court nga si Valdez kag ang iya staff nga si Brendo Eligio, ang may salabton sa pagpeke sa balor sang indi magnubo pito ka cash slips, kun sa diin ang manubo nga balor ang ginpasaka sa ginatos ka libo.
Suno sa Prosecutor, P364,778 ang ginsukot ni Valdez para sa expenses nga sa kamatuoran sulusobra lamang sa dos mil pesos.
Ang duha ang lunsay ginpamatbatan sang seven counts sang falsification of public documents, nga may minimum sentence nga duha ka tuig kag may maximum sentence nga anom ka tuig sa kada count ukon kabug-usan nga 42 ka tuig nga pagkapriso.
Sila ang ginmultahan man sang tig-P35,000 kada isa.
Ang reklamo ang ginfile sang 2012, nga ginpanindugan sang prosecutor nga maathag nga may intensyon sa pagpangawat sang public funds.
Na-acquit naman ang tatlo ka iban pa nga nagserbe sa idalom ni Valdez, kaangay nanday Ricardo Dahildahil Jr., anay pinuno sa management and audit service office; former city accountant Eduardo Ravena; kag ang clerk nga si Lalaine Villalva.
Sa ruling sang korte, napaslawan sang prosecutor nga ma-establishar ang direct involvement sang tatlo sa scheme.
Apang, abswelto naman sila nga tanan kalakip si Valdez kag Eligio, sa mas mabug-at nga kaso sang malversation of public funds.
Apisar nga napamatud-an ang pagpeke sa reimbursement documents, paathag sang korte nga wala sang pamatuod nga wala napatigayon ang mga programa nga ginpondohan sang gobyerno.
