Tuman ang pagpasalamat sang anay Patrol Reporter sang Bombo Radyo Bacolod sa estasyon bangud sa nabulig sang anum sini ka tuig nga serbisyo sa iya kadalag-an sa karun bilang Top Student sang labing una nga Basic Training Course sang Coast Guard Civil Relations Service nga ginpatigayon sang Mayo 20 tubtob Disyembre 1, 2020.
Magluwas sa ginbaton sini nga Award of Excellence sa pag-angkon sang highest over-all grade lunsay sa academic kag non-academic subjects nga may average grade nga 95.58% sa 21 tanan ka mga estudyante, ginpasidunggan man si Probationary Ensign Frances Doren Balboa sang Award of Distinction sa pag-graduate nga wala sang grade nga manubo sa 85% kag CGCRS Award of Recognition bangud siya ang nakatapos nga may pinakamataas nga average grade sa academic subjects nga may 94.41% kag CGCRS Deputy Commander Award of Recognition sa pag-angkon sang pinakamataas nga average sa non-academic subjects nga 98.28%.
Sa exclusive interview sang Bombo Radyo kay Balboa, ginpahayag sini nga dako ang nabulig sang anum ka tuig sini nga pag-ubra sa estasyon kag tuman ang iya pagpasalamat sa mga ihibalo kag eksperyensya nga iya nakuha sa Bombo Radyo bangud iya gid ini nagamit sa iya training sa Philippine Coast Guard.
Suno sa anay patrol reporter, handom niya halin sang una ang mag-ubra sa media kag sa sulod sang anum ka tuig nga pagserbisyo paagi sa Bombo Radyo, nagapati ini nga nalab-ot na niya ang handum kag luyag naman sini nga matun-an pa kun ano ang iya sarang nga mahimo rason kun ngaa nag-apply ini sa PCG.
Aminado si Balboa nga gindudahan sini ang iya kapasidad physically bangud sa training nga malapit isa ka tuig apang ginpili sini nga mangin maisog.
Apisar nga challenge para diri ang mga physical trainings, wala ini nakaupang sa iya sa pagpadayon bangud nagapati ini nga kun masarangan sang lalaki, indi man ini imposible para sa mga babaye.
Tuman man iya ang kalipay nga nangin kabahin siya sang Coast Guard Civil Relations Service nga ang tinutuyo amo nga pagreach out sa mga tawo kag pagdaog sang ila mga panghuna-huna kag tagipusuon.
Gin-athag man sini nga indi lang sa baybay naga-ubra ang PCG bangud nagaserbisyo man sila paagi sa humanitarian service nga isa sa pinakadako nga role sang CG-CRS.
Tuman ang kalipay ni Balboa nga iya na nabaton ang resulta sang anum ka bulan sini nga pagpangabudlay sa nasambit nga kurso kag apisar nga wala pa sila nakalab-ot sa field, may ihibalo na ini kun ano ang ila tup-an sa tion nga magserbisyo na sa PCG.
Nagpang-abiso man ini sa mga luyag nga mangin kabahin sang Philippine Coast Guard nga indi paglimitahan ang kaugalingon kag indi magduha-duha nga mangin maisog kag magwa sa ila mga comfort zone.
