One successful fangirl ang anay reporter sang Bombo Radyo Bacolod kag sa karun Public Affairs Officer sang Philippine Coast Guard matapos manotisyaran sang frontman sang British rock band nga Coldplay sa ila concert sa Philippine Arena sa Bulacan kagab-i, nga gintambungan man nanday President Ferdinand Marcos Jr. kag First Lady Liza Araneta Marcos.
Suno kay Coast Guard Ensign Francis Doren Balboa-Baterbonia, tubtob sa karun, indi ini gihapon makapati nga nanotisyaran ni Chris Martin ang placard sini nga yellow nga may nakasulat nga “IN 2017 I WAS AT THE FAR BACK, NOW I AM THIS CLOSE” kag siya ang ginpasaka sa stage.
Ginpapungko ini ni Martin sa iya tupad sa atubang sang keyboard kag ginpamangkot kun ano ang iya song request kag nagsabat naman si Baterbonia sang “Everglow” nga gintukar kag ginkanta man sang singer.
Suno diri, tuig 2017 sang una ini nga nagtambong sa concert sang banda kun sa diin sadto, empleyado pa ini sang Bombo Radyo Bacolod.
Suno sa iya, sadto, yara siya sa likod nakapwesto kag indi visible ang banda sa iya gani nagpromisa ini sa iya kaugalingon nga sa masunod nga konsyerto, siya ang makapwesto na sa barricade nga natuman subong nga tuig.
Samtang, suno kay Baterbonia, sa ibabaw nakapwesto sanday President Ferdinand “Bongbong” Marcos Jr. kag First Lady Liza Araneta Marcos nga nagtambong man sa concert.
Suno diri, nagatindog lamang ang Presidente kag ang First Lady sa ila designated area samtang nagalantaw kaupod ang kapin 55,000 ka mga Filipino nga nag-attend sang konsyerto.
Ang British rock band nga Coldplay ang ginalakipan nanday Chris Martin, Jonny Buckland, Guy Berryman kag Will Champion.
Pila sa mga sikat nga kanta sang mga ini ang “Yellow”, “Everglow” kag “The Scientist”.
