Para kay former Comelec Commissioner Atty Rowena Guanzon, malipayon siya subong nga adlaw bangod manaog na si Leyte 1st District Representative Martin Romualdez bilang House Speaker.
Sa interview sang Bombo Radyo Bacolod kay Guanzon, tuman ang iya kalipay nga manaog na sa pwesto si Romualdez bangod halos mga buwaya lang man ang nagasuporta sa iya.
Suno diri, ginagutom ang mga tawo apang sila sa pwesto wala nahuya nga mangawat.
Suno pa diri, madugay na gid sini nga ginaduso nga pahalinon si Romualdez halin sa pagpasulod sini sa General Appropriations Act (GAA) sang mga ayuda kag flood control projects nga ginagamit agud sila makapangkwarta sa tawo.
Panawagan ni Guanzon, indi na pagliwaton nga magpa-into sa mga pulitiko nga nagahatag sang bisan pila lang sa tion sang eleksyon kag pag-abot sa pagpungko sini sa pwesto wala lang man sang mapuslan ang tawo sa iya.
Ginalauman sini sa karun sa bag-o nga magpungko bilang House Speaker nga may huya kag indi pagsundon ang ginhimo ni Romualdez.
Samtang, para kay Guanzon dapat man nga may salabton si Senate Committee on Finance Chairperson Senator Grace Poe sa mga nagakatabo sa mga insertion sa budget.
