Nagpagwa sang pahayag si anay Comelec Commissioner Rowena Guanzon agud athagon ang natabo sa Rockwell Mall sa Manila kun sa diin naakig ini sa Chinese national.
Sang isa ka adlaw may nagwa nga video nga nakuha sa nasambit nga mall kun sa diin akig nga nagalalis sa isa ka lalaki ang anay opisyal sang Commission on Elections.
Nagpamuyayaw man ini bangud sa kaakig kun sa diin nakakuha ini sang atensyon sang madamo nga mall goers.
Suno kay Guanzon, nahigh blood ini kag gin-assist siya sang Medics sang nasambit nga mall bangud gin-alegar sini nga ginhambalan siya sang ginapahayag nga Chinese national nga maghalin sa mall bangud nga CONTAGIOUS ukon makalalaton ini kasunod sang pag-ubo sini bangud sa makatol nga tutunlan.
Suno diri ginhambalan niya ang lalaki nga kun nahadlok ini nga magbalatian dapat wala ini nagpadulong sa mall.
Dugang pa ni Guanzon nga wala sang kinamatarong ang nasambit nga indibidwal agud nga pahalinon siya.
Wala man nagpangayo sang pasaylo ang lalaki sa iya.
Ginpahayag man sini nga ang asawa pa sang lalaki ang nagpangayo sang pasaylo.
Bangud man sa insidente ginpasakaan sang reklamo sang anay opisyal sang COMELEC ang nasamnbit nga persona.
