Nagapati ang abogado nga mahimo magrequest sang political asylum si former Ako Bicol Partylist Representative Zaldy Co sa iban nga pungsod.
Sa interview sang Bombo Radyo Bacolod kay Atty Jayvee Hinlo, Deputy Secretary General for Visayas sang PDP-Laban, wala maayo nagahulag ang administrasyon sa una nga imbestigasyon sa flood control projects kag kaagay nga wala gid ginapressure nga mapapauli si Co.
Apang sang gintudlo na sang anay kongresista sanday President Ferdinand “Bongbong” Marcos Jr. kag House Speaker Martin Romualdez nga mastermind sa P100 billion budget insertion, didto na kag nangin madasig ang tikang sang gobyerno.
Welcome development para sa abogado ang pagpagwa sang arrest warrant batok kay Co kay 17 ka iban pa nga ginalakipan sang mga opisyales sa Department of Public Works and Highways kag contractors.
Apang kwestyonable pa suno diri kun diin kutob ang imbestigasyon.
Ginakahangawa sini nga tubtob lamang kay Co kag sa mga opisyales sang DPWH ang mapamatbatan kag malikaw na ang isyu sa ila ni Romualdez kag sa Presidente.
Suno kay Hinlo, mahimo gamiton ni Co nga rasun sa pagrequest sang political assylum amo ang paglagas sa iya sang administrasyon bangod gintudlo sini nga ginadul-ungan niya sang bilyon nga balor sang kickbacks ang Presidente kag pakaisa sini nga anay House Speaker.
Paathag sang abogado nga sarang makapangayo sang political refuge si Co sa iban nga pungsod kag ini ang mangin valid tubtob nga si Marcos pa ang Presidente.
Nagapati si Hinlo nga valid ang kahadlok ni Co para sa iya kabuhi kun magpauli sa Pilipinas ilabi na nga may nauna na nga pamahog.
Nahibaluan nga santo sa report sa Department of Interior and Local Government, si Co ang ulihi nga nasiplatan sa Japan.
Suno kay Hinlo, may kilala ini nga personalidad sa politika nga yara man sa karun sa Japan nga nag-apply para sa political asylum.
