Gintindugan ni anay Department of Health Secretary Congresswoman Dr. Janette Garin nga wala sang krisis sa sektor sang ikaayong lawas bisan indi maghatag sang subsidy ang gobyerno sa Philippine Health Insurance Corporation (PhilHealth).
Sa interview sang Bombo Radyo Bacolod kay House Deputy Speaker kag Iloilo 1st District Representative Dr. Janette Garin, indi dapat magpati sa mga pamahog kag alarmist.
Paathag sini nga may operational budget ang PhilHealth bilang Government Owned and Controlled Corporation (GOCC).
Padayun man ang koleksyon sang mga ini sang premium sa membership, apang sang tinalikdan nga mga tinuig, daw nakaandan na nga ang gobyerno ang nagahatag pagid sang subsidy.
Ang subsidy ang ginahatag sang gobyerno para sa enrollment sang mga senior citizens kag indigents ukon 4Ps.
Halimbawa sini nga kun ang gobyerno ang nagahatag sang P10 million nga subsidy, kun kaisa P6 million lamang ang magamit sang PhilHealth sa enrollment kag ang mabilin ang nagatingob nga ginagamit para sa investment.
Aminado si Garin nga kun sumahon tuman ka gamay ang balik sa segi-segi nga kontribusyon sang members, bangod sa limitado nga coverage sang mga benefit packages.
Bangod nagdangat na sa masobra P600 billion ang reserved funds sang ahensya, nagapati si Garin nga nagakadapat lang ang indi paghatag sang national government sang subsidy.
Paathag sini nga ginahitso lamang sang bicameral conference committee ang wala sa ayos nga budget sang PhilHealth.
