Nagfile sang certificate of candidacy sa Social Hall sang Negros Occidental Provincial Capitol si Engr. Lea Delfinado para pagka-Kongresista sa 4th District sang Negros Occidental.
Si Delfinado nga anay Department of Public Works and Highways (DPWH) Region 6 Director, ang magapapili sa idalom sang Nationalist People’s Coalition (NPC).
Ang bata sini nga si Engr. Leo Carlo Delfinado ang nagfile man sang COC bilang Board Member sang 4th District sa idalum sang Partido Federal ng Pilipinas (PFP).
Ginalantaw nga makasumpong sini si Vice Governor Jeffrey Ferrer ang nagaplano man nga magpapili sa pwesto kag ginalantaw nga magafile sang COC bwas.
Sa interview sa Congressional candidate, ginpanindugan sini nga bisan sin-o ang mahimo magpapili kag siya ang magafocus na lamang sa iya kampanya.
Suno diri, sa iya 37 ka tuig nga pagserbisyo sa National Government, ang iya experience ang nagahatag sa iya sang kapasidad para sa pwesto.
Pahayag sini nga sa iya paglibot matapos ang pagretiro, nakita niya ang mga sarang pa nga mahimo para sa pag-uswag nga amo ang nagpukaw sa iya balatyagon nga magpadalagan.
Samtang hulaton naman sini nga matapos ang period sang COC filing antes magpatigayon sang press conference agud ilatag ang iya alliances partikular na sa Mayoral candidates.
