Ginalauman nga ibalik sang anay opisyal sang Department of Public Works and Highways (DPWH) ang masobra P200 million sa gobyerno bilang restitution.
Suno sa Department of Justice (DOJ), posible nga i-turnover ni former DPWH official Henry Alcantara ang kwarta sa masunod nga semana samtang nagaproseso siya sang iya application sa Witness Protection Program (WPP).
Madumduman nga ginbalik na ni alcantara ang P110 milyon sa gobyerno sang Nobyembre.
Samtang kahapon, nagbalik liwat si Alcantara sa Justice Department samtang nagapadayon siya sa pagkooperar sa imbestigasyon angot sa anomlaous flood control projects.
Upod sini sanday anay opisyal sang DPWH nga si Roberto Bernardo, Brice Hernandez kag Jaypee Mendoz nga ginkabig nga “protected witnesses.”
Sila ang yara sa “provisional acceptance” sa WPP.// Ginpahayag ni Justice spokesperson Polo Martinez nga ang reklamo batuk kay anay Ako Bicol Party-List Representative Zaldy Co ang ginsumiter para sa resolution.
Si Co ang una na nga ginlakip bilang dugang nga respondent sa reklamo angot sa ghost flood control project sang SYMS Construction sa Bulacan.
Suno kay Martinez, wala nag-submit sang iya counter affidavit si Co.
Dugang pa sini, tubtob Disyembre 5 ang deadline ni Zaldy Co agud nga mag-file sang iya counter affidavit sa isa sa lima ka kaso nga involve ang SYMS Construction.
Ginpagayag ni Martinez, nga si Co ang wala gid nagpakita kag wala man nagrepresentar sang abogado.
Bangud sini ang kaso niya ang ginsumiter para sa resolution bisan pa nga wala sang counter affidavit.
