Ginmanduan sang Sandiganbayan Third Division ang UP Philippine General Hospital kahapon nga i-examine si Leyte Representative Martin Romualdez kag iberipika ang findings sang mga doctor sang Cardinal Santos Medical Center, kun diin ini naka-confine.
Ini ang gin-anunsyo ni Sandiganbayan Third Division chairperson Associate Justice Karl Miranda matapos mabatian ang mga testimoniya naggikan sa mga physician sang mamalidha.
Natalana nga isaylo kag i-confine si Romualdez sa UP-PGH nga ginapanag-iyahan sang pungsod, sumugod bwas, Sabado nga adlaw, Setyembre 12.
Nagapangatubang si Romualdez kag ang iya tatlo ka mga co-accused sang P7.4 billion plunder charge may kaangtanan sa flood control scam.
Suno sa anti-graft court, i-transfer si Romualdez gamit ang ambulansya nga may ikasarang nga mag-cater sang iya nga heart kag brain-related nga mga balatian.
Kinahanglan nga makasumiter sang report ang PGH sang resulta sang eksaminasyon sa Lunes, Setyembre 14.
Gin-idug naman ang arraignment sang anay speaker sa Setyembre 16, alas-8:30.
Nagpahayag ang cardiologist ni Romualdez nga si Rody Sy nga kinahanglan sang mamalidha sang apat tubtob anum ka semana agud maka-recover ini sa iya mga ginabatyag nga sakit nga tuga sang stress.
Ini ang ginsabat ni Sandiganbayan Associate Justice Ronald Moreno, nga ang apat tubtub anum ka semana nga kalawigon ang mahimo mag-resulta sa tuman nga pagbatikos sa ila sang publiko.
