Hugot nga ginpanginwala ni anay House Speaker Martin Romualdez ang mga alegasyon natuhoy sa mga iregularidad sa national budget para sa mga flood control projects, kag nagpanindugan ini nga ang korapsyon ang nagakatabo sa implementasyon sang mga ahensya kag indi sa proseso sang paghimo sang layi sa kongreso.
Suno kay Romualdez, ang pagsumite sang national budget ang produkto sang malaba nga proseso humalin sa Ehekutibo, Kamara, kag Senado.
Ginpanindugan niya nga wala sang ihibalo ang mga mamalidha sa procurement, inspection, kag aktwal nga pagtukod sang mga imprastraktura.
Dugang pa sang mamalidha, indi siya kabahin sang bicameral conference committee ukon sang small committee nga nag-draft sang final form sang budget.
Sa baylo nga mag-ako sang responsibilidad, gintudlo ni Romualdez ang duha ka mga opisyal nga sanday Sen. Francis “Chiz” Escudero kag anay Ako Bicol Representative Zaldy Co, nga ginaalegar may direkta nga kontrol sa mga desisyon sa pagpondo.
Agud mapamatud-an ang iya pagkainosente bilang mastermind sang nasambit nga anomaliya, ginhangkat ni Romualdez ang publiko nga usisaon ang mga proyekto sa iya kaugalingon nga distrito sa Tacloban.
Gintugutan niya ang iya mga tinawo nga ipagwa ang listahan sang tanan nga mga proyekto sa iya hurisdiksyon para sa pag-usisa sang publiko.
Ginklaro niya nga ang matuod nga command responsibility para sa implementasyon sang mga proyekto yara sa sanga sang Ehekutibo, partikular sa Department of Public Works and Highways (DPWH), kag indi sa isa ka collegial legislative body kaangay sang Kamara kag Senado.
