Nakabalik na sa pungsod si anay Iloilo City Mayor Jed Patrick Mabilog matapos ang kapin pito katuig nga pagpabilin sa iban nga pungsod.
Ang pagbalik sini ang matapos ma-tag bilang isa ka narco-politician sadtong administrasyon ni anay President Rodrigo Duterte.
Sa iya nga pag-abot sa Ninoy Aquino International Airport (NAIA) Terminal 3, mga alas 11:00 ang takna sang aga, Setyembre 10, 2024, sakay sa Cathay Pacific flight halin sa New York, United States, ginsugata si Mabilog sang mga operatiba sang National Bureau of Investigation (NBI).
Sa exclusive interview sang Bombo Radyo kay NBI Director Jaime Santiago, ginkumpirmar sini nga boluntaryo nga nagsungka si Mabilog sa mga personnel sang NBI-NCR.
Suno kay Santiago, ginserbe kay Mabilog ang warrant of arrest bangud sa mga paglapas sa RA 3019 (Anti-Graft and Corrupt Practices Act) kag Code of Conduct and Ethical Standards.
Ang warrant of arrest ang ginserbe sa NAIA Terminal 3 sang NBI-IAID sa Pasay City.
Sa karun yara sa kustodiya sang NBI-IAID si Mabilog kun sa diin nagpaidalom sa proseso.
Gindala siya sa Sandiganbayan kag nagpiyansa sang P90,000 para sa temporaryo sini nga kahilwayan.
Si Mabilog ang ginreport nga kalakip sa mga gin-imbeteran nga resource persons nga ginalauman sa liwat nga pagpadayon sang Quad Committee House Probe sa Huwebes.
