Ginpahayag sang isa sa complainant sa kaso nanday former President Rodrigo Duterte, Senator Ronald “Bato” dela Rosa kag iban pa, sa International Criminal Court, nga mas mangin mahapos ang pag-aresto sa Senador sa pahalin sini sa Senate building.
Ini matapos ginreport nga kaina alas-2:30 sang kaagahon, naggwa na sa Senado si Senator Bato upod kay Senator Robinhood “Robin” Padilla.
Sa interview sang Bombo Radyo Bacolod kay former MAGDALO representative Garry Alejano, mas maayo nga wala na sa Senado si Senator Bato agud wala sang dako nga komplikasyon sa pag-aresto sa iya.
Madumduman nga nangin magamo ang sitwasyon sa Senado matapos ang pagbalik sang Senador para magboto sa pagpungko ni Senate President Alan Peter Cayetano, kun sa diin siya ang ginlagas sang mga agents sang National Bureau of Investigation sa sulod sang Senate building.
Ini ang ginpaidalom sa Senate protection, apang kagab-i liwat nag-ibwal ang kinagamo matapos ang gin-alegar drilling sang mga NBI agents gikan sa GSIS building tabok sa Senate building, nga nasundan na sang madamo nga paglinupok.
Suno kay Alejano, bisan yara pa sa Senado, valid ang warrant of arrest sang ICC gani ini ang pwede nga iserbe.
Apang bangod sa lainlain nga legal interpretation, nagabudlay ang pagpatuman sini.
Suno kay Alejano, kun siya ang masunod, hatagan sini sang ultimatum ang Senado sa pagsurrender kay Senator Bato, bangod ang pagprotekta nila sa wanted person ang makabig na nga paglapas sa International law.
Dugang pa sini nga tubtob wala sang Temporary Restraining Order ang Korte Suprema, sarang ini nga arestuhon kun hungdon.
Pahanumdom sini nga ang mga Senador ang nagahimo sang layi, gina sila man ang ginalauman nga una nga magasunod sa layi.
Karun nga wala na ini sa Senado, sarang naman makapatigayon sang manhunt operation.
Wala naman sang magamit nga alibi si Senator Bato agud siya ang indi madakop kaangay sa ginhimo sini sa sulod sang Senado.
Gintawag man sini nga makahuluya kag kaladlawan, ang pag-amba ni Senator Bato sang Philippine Military Academy hymn.
Suno diri, ang ambahanon ang ginagamit sa mga solemn events, kag indi dapat gamiton sa personal nga interes.
