Nagapanawagan si Former Negros Occidental Governor Rafael Coscolluela sa Department of Environment and Natural Resources para sa immediate deployment sang technical survey team para magconduct sang assessment sa Mt Kanlaon Natural Park kasunod sa pagluntad sang flashflood nga may dala nga dalagko nga troso kag dalagko nga mga bato.
Madumduman nga nagluntad ang flashflood sa ciudad sang Canlaon, Negros Oriental kadungan sa paglaslas sang bagyo TINO.
Sa interview sang Bombo Radyo Bacolod kay Coscolluela, madamo sang nakibot sa natabo sa palibot sang Mt Kanlaon Natural Park kasunod sa nagluntad nga flashflood kun sa diin naanod ang mga troso kag mga dalagko nga bato halin sa ibabaw padulong sa dalanon.// Ginalantaw diri nga rason amo ang paglupok sang bulkan kag pila ka beses nga pagluntad sang ashfall nga amo ang nagpata sa mga kakahoyan kag nag-apekto sa vegetation.
Bangod sini, wala na sang may nagpugong sa mga kahoy kag mga bato nga indi maanod.
Dugang pa sini, posible man nga may illegal quarry nga ginpatigayon ukon may naga-kaingin ukon naga-uling sa ibabaw apang indi mapatihan nga wala sang may makasiplat sa nagakatabo.
Pahayag ni Coscolluela, kun lantawon sini kaangay nga ginkaros ang kilid sang bulkan sa gin-agyan sang landslide kag flashflood.// Pahayag sini, dapat liboton ang bulkan agud mahibaluan ang rason sa landslide kag flashflood kag matun-an kun ano ang mahimo bangod nagapati ini nga kun indi ini matapna, sa dason nga may mag-abot nga bagyo, ukon madamol nga ulan ukon maglupok ang bulkan, delikado nga liwat nga matabo ang flashflood kag landslide.
