Nagfile si former Negros Oriental governor Pryde Henry Teves sang waiver nga nagapahanugot sa Department of Justice (DOJ) sa paglantaw sang unod sang iya nga mga bank accounts, phone records kag emails sa tinutuyo nga ma-clear ang iya nga pangalan.
Personal nga nagpadulong sa Hall of Justice sa Dumaguete City kahapon sang aga si Teves dala ang waiver, nga suno sa iya mahimo makabulig sa mga otoridad sa ila nga nagapadayun nga imbestigasyon sa iya kasubong man sa utod sini nga si suspended Negros Oriental Third District Rep. Arnolfo “Arnie” Teves Jr.
Sa waiver, ginpahayag ni Teves nga siya ang isa ka “law-abiding citizen” kag ini ang wala sang ginatago kag ang luyag lamang sini amo ang mangabuhi sang malinong.
Una na nga ginpahayag sang anay gobernador nga wala ini sang plano nga magbiya sa pungsod, sa pihak sa mga posibilidad nga pagfile sang kaso nga illegal possession of firearms and explosives batok sa iya.
Ginpanawagan man sini sa iya nga utod nga magpauli na kag atubangon ang mga alegasyon nga ginapangatubang sini.
Nahibaluan nga ang Teves brothers ang parehas nga gina-angot sa pagpatay kay Negros Oriental governor Roel Degamo kag sa walo ka iban pa sang Marso 4, kun sa diin si Congressman Teves ang gina-alegar isa sa mga mastermind sa krimen.
Una naman nga ginpahayag ni Justice Secretary Jesus Crispin Remulla nga mahimo maulamid si former Governor Teves matapos makakumpiskar sang mga high-powered firearms, linibo nga mga live ammunitions, rocket-powered grenades, improvised explosive devices kag cash nga balor P18 million sa isa ka sugar mill compound nga ginapanag-iyahan sini sa banwa sang Sta. Catalina.
Tatlo sa mga security personnel sang anay Gobernador kalakip na ang iya nga head of security nga si Nigel Electona sa mga gin-aresto matapos ang sang Biyernes tubtob Lunes.
Pasalig naman sang ni former Governor Teves nga willing siya nga magkooperar sa mga otoridad sa imbestigasyon.
