Ginhingyo sang kampo ni former Presidente Rodrigo Duterte sa International Criminal Court (ICC) Appeals Chamber nga pahanugutan siya nga indi magtambong sa natalana nga hearing sa Abril 22, 2026 angot sa iya war on drugs case.
Suno sa iya mga abogado, ang legal team lamang ang maga-atubang sa hearing sa The Hague, sa diin paga-istoryahan sang Appeals Chamber ang apelar sang depensa angut sa isyu sang jurisdiction sang ICC sa kaso.
Wala sang may ginhatag nga partikular nga rason ang kampo ni Duterte kun ngaa indi makatambong sa hearing ang anay presidente.
Masobra na isa ka tuig nga napreso si Duterte sa The Hague samtang nagapangatubang sang kaso nga crimes against humanity may kaangtanan sa iya kampanya batok sa iligal nga druga sang siya ang presidente sang pungsod humalin 2016 tubtob 2022.
Una na nga ginbasura sang ICC Pre-Trial Chamber ang pagpamatok sang kampo ni Duterte nga wala na sang jurisdiction ang korte matapos nga nag-withdraw ang Pilipinas sa Rome Statute sang 2019.
Apang nagapanindugan ang ICC nga may yara pa ini sang hurisdiksyon sa mga kaso nga natabo sang katapo pa sang tribunal ang pungsod.
