Nag-abot na sa The Netherlands ang eroplano nga ginasakyan ni former President Rodrigo Duterte alas 11:54 kagab-i, oras sa Pilipinas, kag sa karun yara na ini sa kustodiya sang International Criminal Court.
Sa isa ka video nga ginpost sang anay Presidente sa iya Facebook page antes nagland sa Rotterdam, ginpahayag ni Duterte nga maayo ang iya kahamtangan kag wala sang dapat kabalak-an ang iya mga supporters.
Suno diri, ini ang mangin malawig nga legal proceeding kag siya ang magapadayon sa pagserbisyo sa iya nga pungsod.
Dugang pa sini nga iya pagabatunon kun amu man sini ang iya kapalaran.
Si Duterte ang magaatubang sa ICC sa labing una nga kahigayunan bangud sa crimes against humanity sa kamatayon sang kapin 27,000 ka mga persona sa war on drugs sang iya administrasyon.
Sa iya nga first appearance, siya ang pahibaluon sang iya mga kinamatarong lakip na ang right nga mag-apply para sa isa ka interim release pending trial kaangay sang piyansa sa proseso sa Pilipinas.
Si Duterte ang ginalauman nga magatinir sa ICC detention center, nga nalocate sa coast sa The Hague kag kun sa diin nakadetain man ang mga kilala nga war criminals sa kalibutan.
Samtang, may mga Pinoy naman nga nagbantay sagwa sang ICC agud magpakita sang suporta kay Duterte.
