Gindayaw sang former President sa Integrated Bar of the Philippines (IBP) Negros Occidental Chapter ang 3,812 ka mga panibag-o nga mga abogado nga nagtake-oath kahapon nga ginfacilitate sang Korte Suprema sa pagpanguna ni clerk of court Atty Marife Lomibao Cuevas.
Ini ang labing una nga kahigayunan sa maragtas sang Korte Suprema kun sa diin ginpatigayon ang Lawyer’s Oath kag signing of the Roll of Attorneys sa isa lamang ka event.
Sa interview sang Bombo Radyo Bacolod kay Atty Arnel Lapore, gincongratulate sini ang mga panibag-o nga miyembro sang IBP partikular na sa mga makabahin sa Negros Occidental Chapter.
Mensahe sini sa mga bag-o nga abogado nga sa kun diin man nga line of expertise magasulod, nga alagaan ang reputasyon kag dignidad sang nasambitan nga propisyon.
Gindumdom sini ang statement sang Supreme Court nga “Law Profession is a Noble Profession”, kun sa diin ang ila trabaho ang indi negosyo kundi serbisyo sa paghatag sang hustisya sa publiko, kumunidad kag pungsod.
Pahanumdom sini sa mga bag-o nga abogado nga indi piyongan ang miyon kag ihatag ang dedikasyon, kaupod ang devotion, passion, pagpalangga kag mataas nga reputasyon sa propisyon sa pagserbisyo sa nagakinahanglan.
Pasalig ni Lapore nga may-ara gid sang pro bono sa ila legal offices partikular na sa mga indi makasarang nga makita nga nagakadapat depensahan agud makaangkon sang hustisya.
Suno diri, may programa ang IBP kun sa diin kun tuman na kadamo sang kaso nga gina-atubang sang Public Attorney’s Office (PAO), ila ini nga ginabuligan sa paghandle sang mga kaso.
Pahanumdom sang abogado sa mga new passers nga palarehas ang panan-awan sang husgado bangod isa lang ang libro nga ginasundan, kag may bayad man ukon wala palarehas man ang ginademand sang korte sa mga abogado.
Gani dapat nga hatagan gid sang nagakaigo nga oras kag effort kun may ginapakigbato nga kaso.
Suno kay Lapore, sa masami ang mga bag-uhan man nga mga abogado ang ginapadala sa mga malayo nga mga lugar nga mabudlay malab-ot agud sila ang mahanas, kag sila ang ginagiyahan man sang mga beterano nga mga abogado.
Ini bangod dako ang kinalain sang courtroom drama sangsa classroom learning process, ilabi na nga wala ginabasihan ang edad ukon plastada sa kabuhi sang mga abogado, kundi sa ila pagplastar kag depensa sa ila gina-uyatan nga kaso.
