Ginbuyagyag ni anay Department of Public Works and Highways (DPWH) Bulacan District Engineer Henry Alcantara bilang testigo sa korte, nga gin-alegar nagdangat sa P90 million ‘kickback’ fee ang ila natipon para kay former senator Ramon “Bong” Revilla Jr. angot sa isa ka flood control project sa Bulacan.
Ginpahayag sang anay DPWH District Engineer nga ginmanduan ini sang iya anay boss nga si former Public Works Undersecretary Roberto Bernardo nga magkolekta sang nasambit nga balor sa mga contractor.
Suno kay Alcantara, ginkuha ang kwarta halin sa advance payments sang mga contractor kag ginpadala sa isa ka hotel sa Roxas Boulevard paagi sa iya nga driver.
Suno diri, ang P90 million ang ginbutang sa apat tubtob lima ka bank boxes nga nagaunod sang tig-P20 million ang kada isa.
Apang, ginpahayag sang isa ka testigo nga indi na sini madumduman kun direkta nga ginbaton ni Revilla ang kwarta.
Suno pa kay Alcantara, siya ang nagapirma sa mga dokumento nga naga-autorisa sa bayad para sa P92.8 million nga flood control project sa Pandi, Bulacan, apisar indi ini mismo ang naghimo sang inspection sa proyekto.
