Ginpahayag ni former Senator Francis “Kiko” Pangilinan ang iya intensyon nga buligan ang iya hinablos nga si Chito Miranda kag asawa sini nga si Neri Naig matapos nga gin-aresto ang aktres bangud sa kaso nga estafa kag pila pa ka counts sang securities violation.
Una na nga nagpahayag sang pagdepensa sa asawa si Chito kun sa diin ginpahayag sini nga endorser lang si Neri sang dermatological clinic nga involved kag gingamit ini agud nga mag-ganyat sang mga investors.
Suno kay Kiko, nakahanda ini nga magbulig kag bilang abogado, ginpahayag niya nga ang product endorser isa ka talent kag kun wala sang koneksyon ukon kahilabtanan sa ownership ukon management kag operations sang kumpaniya nga involved sa illegal nga operations, indi dapat manabat si Neri sa ginaalegar iligal nga buluhaton.
Isa lang ang anay senador sa mga personalidad nga nagpabutyag sang suporta para sa mag-asawa nga nagapangatubang sang kontrobersiya.
Suno pa sa anay Senador, saksi siya sa kaayo ni Neri kag nagapati ini nga biktima lang ini sang mga estafador gani ang dapat nga lagson diri amo ang mga tag-iya kag nagapadalagan sang natumod nga kumpaniya.
