Ginpasalamatan ni Silay City mayor-elect Joedith Gallego ang tanan nga nagsuporta sa iya kandidatura bilang alkalde agud nga mapatuman man sini ang tanan nga plano para sa syudad.
Si Gallego ang anay security guard sa Adsisa Sugar Central sa Barangay E. Lopez, Silay City, nangin punong barangay sang Barangay E. Lopez, kag nangin bise alkalde sang syudad sang tuig 2016.
Suno kay Gallego, may yara siya sang 10 point agenda para sa syudad.
Ini ang ginalakipan sang plano para sa mga Silaynon nga magbutang sang help desk 24 oras sa ospital agud nga may yara sang mapalapitan ang mga pigado nga pasyente.
Hatagan sang school bus ang mga pigado nga mga kabataan nga nagaeskwela kaangay sa syudad sang Talisay nga magadul-ong kag magasugat sa mga estudyante.
Ang mga estudyante naman nga naghalin sa mga nabukid nga bahin sang syudad nga nagaboard ang tinguhaan nga mabuligan sa pagbayad sang ila nga boarding house ilabi na ang mga kabataan sang mga nagatrabaho sa kampo.
Ang mga rough roads sa suludlon nga bahin sang syudad ang tinguhaan man nga mamintar agud indi man mabudlay sa mga residente bangud indi pa sa karun masarangan sang syudad nga ipasemento ang mga dalan.
Tinguhaan man nga mabutangan sang mga solar lights ang mga madulom nga bahin sang syudad.
Nagpasalig man ini mga mangin maayo ang iya nga pagtrabaho kaupod sa mga konsehal kag bise alkalde sang syudad apisar nga indi niya ini kaalyado.
Suno kay Gallego natapos na ang eleksyon kag dapat ipaiway na ang pulitika kag dapat nga mag-ugyon sa pagpalakat sang syudad.
Ginpahayag man sini nga bukas siya sa tanan para sa paghatag sang bulig.
